1Jo 3 | AOJFILIFITA | STEP | Eh! Ahalomapa God okom nainailapa endilisi. EaꞋ Anan nofalapa awasi ananipai. Endilisi, apeꞋ awasi ananipai atepa. Isima sandaiwaꞋma Godi sape etap anaeꞋ, esis ina sogawa God, owaꞋ. Amama atom deiꞋ esis ina sagawa apeꞋ wapotiꞋ.

1 John 3

DeiꞋ apeꞋ mape awasi Godi

1 Eh! Ahalomapa God okom nainailapa endilisi. EaꞋ Anan nofalapa awasi ananipai. Endilisi, apeꞋ awasi ananipai atepa. Isima sandaiwaꞋma Godi sape etap anaeꞋ, esis ina sogawa God, owaꞋ. Amama atom deiꞋ esis ina sagawa apeꞋ wapotiꞋ. 2 IpeꞋ alupipei, aeꞋ okom nainailipa. DeiꞋ apeꞋ mape awasi Godi. EaꞋ anona nemaf mope miꞋimama, amama apeꞋ ina deiꞋ mogawam, ataꞋ owaꞋ. EaꞋ apeꞋ mogawa anona nemaf Krais notaga alihina, nemaf anama motolona notaga nope endilisi siꞋi Anan nape. 3 Emi egafis sape sohafa Anan nufiꞋi, esis sape sandondombam opalef asasimi laꞋelaꞋef ma sope boꞋwes andeandeꞋ siꞋi Krais nape. 4 Emi egafis sandaꞋ waf aonai, esis sosambala miꞋuli Godi. DeiꞋ main, sandaꞋ waf aonai atona deiꞋ satopaꞋ miꞋuli anama. 5 IpeꞋ pegawa Krais nataga ma nakwaha waf aonai apeꞋ mandaꞋanai hiꞋalana. Anan ina nandaꞋ anona waf aonai, owaꞋ. 6 EaꞋ emi egafis sape laꞋifis saloma Anan, isima ina ataꞋ sape saila waf aonai, owaꞋ. IꞋi emi egafis saila waf aonai, ukup asisimi ina mati Krais sogawana, owaꞋ.

7 IpeꞋ alupipei aeꞋipei, pindumafuma andeandeꞋ! NaꞋama enin epen nembasoꞋmepa. Emi egafis sandaꞋ waf buꞋunai, esis sape andeandeꞋ siꞋi Krais nape. 8 Satan nandaꞋ waf aonai fowaꞋ damba damba nafiꞋi nafiꞋi deiꞋ ataꞋ nape laꞋelaꞋef. Emi egafis sandaꞋ waf aonai laꞋelaꞋef sapomanai, esis epes Satani. Nogalomana Godi nafiꞋi nataga nandawalapa main? Ma nohambombaga opeh Satan nandaꞋami. 9 Emi egafis sape awasi Godi, esis ina sape sandaꞋ waf aonai laꞋelaꞋef, owaꞋ. DeiꞋ main, okom Godi nape opalef asasinai eaꞋ esis awasi Godi. EaꞋ esis ina laꞋifisa ataꞋ sondaꞋ waf aonai laꞋelaꞋef, owaꞋ. 10 IꞋi apeꞋ miꞋi mogawa epen emi egalin, nogalomana Satani o nogalomana Godi, apeꞋ mogowas naꞋama. Emi egalin owaꞋ nandaꞋ waf buꞋunai ma owaꞋ okom ninila alupusi ananisi, enin ina epen Godi, owaꞋ.

Waf ukup maimaila sahin owan apeꞋisi atona etin

11 Basef fowaꞋ damba damba ipeꞋ pameꞋami amama. ApeꞋ ukup mimila esis sahin owan endilisi. 12 ApeꞋ ina mila waf Keini, hapainai. Kein wambota aman aonai Satani eaꞋ naha owalomana Abel nagaꞋ. DeiꞋ maina nahana nagaꞋ? Anan kowalana ma opeh buꞋwami owalomana nandaꞋami deiꞋ nahana nagaꞋ. EaꞋ opeh ananimi aom. 13 IpeꞋ sahin owan aeꞋipei, iꞋi esis sape etapi sowaꞋ alafugaha Godi sindaiwaꞋmepa, ipeꞋ ina gegelelesipa, owaꞋ. 14 ApeꞋ ukup maimaila esis sahin owan, amama apeꞋ mogawa deiꞋ makwahona waf anama gaꞋinai mataga mofaꞋ ambal namunai. DeiꞋ main? ApeꞋ ukup maimaila esis sahin owan endilisi. Emi egafis owaꞋ ukup mimila sahin owan asasisi, esis ataꞋ sape laꞋelaꞋef waf gaꞋinai. 15 Emi egafis ukup aoma sahin owan asasisi, esis siꞋi saha enis amam nematawa sagaꞋi. EaꞋ ipeꞋ pegawa epes saha enis sagaꞋi, esis ina deiꞋ sefaꞋ ambal namunai sapaina sope andeandeꞋ laꞋelaꞋef, owaꞋetin. 16 Waf anama apeꞋ ukup mimila enis epes mogawana naꞋama. Krais nakwaha ambal ananinai ma nagiambamapa. Amama atom apeꞋ wapotiꞋ mokwaha ambagof apeꞋimi ma migiambama sahin owan apeꞋisi. 17 IꞋi emi egafis amamaga hiamisi ma siti sahin owan amamaga aꞋani ma esis owaꞋ ukup mimila sahin owan, epes isima ina ukup maimaila God, owaꞋ. DeiꞋ maina epes isima saꞋi, “Ukup apeꞋimi maimaila God”? OwaꞋ, esis sambasoꞋam. 18 Alupipei aeꞋipei, apeꞋ ina ukup maimaila esis alupisi ma miꞋipasa basefa malogof atom wafimi, owaꞋ. ApeꞋ ukup mimilas endilisi migiambamas mondaꞋ waf buꞋunai endilisinai mihiꞋambamasana.

Epes sembaleꞋefana endilisi, esis ina umbamahasa naep Godi, owaꞋ. Esis laꞋifis sape

19 IꞋi apeꞋ mondaꞋ waf anama ma ukup mimila sahin owan apeꞋisi, apeꞋ mogawa maila basef endilisimi. Waf anama nandaꞋ opalef apeꞋimi awanema mope laꞋifipa ma naep Godi. 20 IꞋi basef mape opalef nomoni maꞋiami maꞋipapa basef mihiꞋambapa waf apeꞋ mandaꞋanai aona, God dembinai nikilaꞋ ukup apeꞋimi eaꞋ nagawa amamaga hiami.

21 Alupipei aeꞋipei, aeꞋ okom nainailipa. IꞋi basef mape opalef nomoni maꞋiami maꞋipapa basef mihiꞋambapa waf apeꞋ mandaꞋanai ina aona, apeꞋ mefeꞋma God opalef apeꞋimi laꞋifim. 22 IꞋi apeꞋ miꞋi mondaꞋ beten mohaliꞋana ma anom amamaga, anan noseꞋapami. DeiꞋ main, apeꞋ maila okom ananinai mandaꞋ amamaga anan nandanifel ma apeꞋ mandaꞋami. 23 Basef laꞋifimi Godi maꞋi naꞋama maꞋi apeꞋ mombaleꞋefa agel nogalomanai Jisas Krais eaꞋ ukup mimila sahin owan apeꞋisi siꞋi Anan naꞋipapa basef laꞋifimi. 24 Emi egafis saila basef Godi laꞋifis, esis sope laꞋifis soloma God eaꞋ God nape laꞋifina nolomas. Anan naseꞋapa Ambal BuꞋunai Ananinai deiꞋ mogawa God nape laꞋifina nalomapa.